My brood en botter (en my stokperdjie)

‘n Gedeelte van my dagtaak is die skep en onderhou van databasisse wat deel uitmaak van die reeks bouverwante kosteberamings sagteware pakette wat ons firma skryf en verskaf. Hierdie databasisse bevat formules wat nie veel verskil van die tipe wat jy byvoorbeeld in programme soos Excel sal gebruik nie. Dit laat ‘n bouer toe om slegs ‘n mate in te voer vir die taak of take wat uitgevoer moet word, en ons program sal die bouer voorsien van ‘n lys van al die nodige materiale en arbeid sowel as kostes daarvan wat nodig gaan wees om die taak uit te voer. Hetsy dit nou betonfondasie, mure bou, pleister, verf, plafonne of watter boutaak ook al mag wees.

Glad nie vuurpylwetenskap nie. En synde dat ek op die drempel staan om kosteberaming, projekbestuur en DIY my permante inkomste te maak, is hierdie inskrywing dalk ‘n interresante eksperiment in of ‘n meer kommersieele blog/webtuiste wat sulke inligting bevat dalk lewensvatbaar kan word. So hier is hy, sonder verdere verwyl.

Kopiereg vir bostaande afbeelding gehou deur Billcost (Pty) Ltd

Boumateriaal Beramings vir Beginners – Steenwerk

Nota 1: Die onderstaande sluit NIE materiaal en arbeid vir fondamente en afwerkings soos pleister in NIE

Nota 2: Hierdie is die ou “tried en tested” site manier van material uitwerk. Die wetenskaplike manier is effe meer ingewikkeld, maar werk byna op dieselfde hoeveelhede uit.

Om ‘n muur te bou gaan jy nodig hê:
Stene
Bousand
Sement
Steenwapening (Brickforce)
Arbeid

Begin deur die lengte en hoogte te neem van die muur wat jy wil bou. Maal die 2 mates met mekaar om die vierkante meters te bepaal

Stene: Kom ons aanvaar “gewone” oftewel imperial stene met mates van 222mm lank, 105mm breed en 73mm hoog.

Vir ‘n enkelmuur (halfsteenmuur) benodig jy 55 stene per vierkante meter. (die korrekte hoeveelhede is 52 maar vir stene laat ons altyd ongeveer 5% toe vir “wastage”)

Vir ‘n Dubbelmuur (eensteenmuur) benodig jy 110 stene per vierkante meter. (die korrekte hoeveelhede is 104 maar vir stene laat ons altyd ongeveer 5% toe vir “wastage”)

Maal nou die hoeveelheid stene per vierkante meter met die oppervlak van jou muur en voila! Jou steenhoeveelheid is bereken. Moenie te ver wegbêre nie, jy gaan hierdie hoeveelheid nou weer nodig kry.

‘n Paar feite en wenke oor stene:

• Die standaard eenheid vir die aankoop van stene is 1000. Dit kan per wipbakvragmotor, in palette van 500 of self met die hand vir klein hoeveelhede afgelewer word. Hoe kleiner hoeveelheid, hoe duurder betaal jy gewoonlik. Wanneer jy stene laat aflewer, is dit verkieslik om dit in palette te ontvang, op daardie manier kry jy die minste brekasie. Die vragmotor wat palette aflewer kan maksimum 16 pallette oftewel 8000 stene vervoer vir die perd en sleepwa model, en 8 palette oftewel 4000 stene vir die korter vastebak vragmotor.
• Wanneer jy ‘n dubbelmuur bou wat siersteen afwerking aan die een kant en pleister aan die ander kant het, onthou om die hoeveelheid stene soos hierbo bereken deur 2 te deel om te bepaal hoeveel sier- en pleisterstene jy gaan benodig. Sierstene is aansienlik duurder as pleisterstene, so jy wil nie meer koop as wat nodig is nie.

Sand en Sement
Jy benodig rofweg 1 kubieke meter sand en 8 sakkies sement om 1000 stene te lê. Neem dus die hoeveelheid stene soos bereken om gou die sand en sement te bereken. Bg berekening is geskoei op ‘n sement/sand mengsel van 1 deel sement:4 dele sand soos voorgeskryf deur die nasionale huisbouers registrasie raad.

‘n Paar feite en wenke oor sand en sement:

• 1 Kubieke meter sand = 16 boukruiwaens = 1tonner bakkie gelykvol gelaai
• 1 Sakkie sement = 0.033 kubieke meter
• 1 kruiwamaat sement = 2 sakkies. Dus in 1:4 mengsel moet jy 2 sakkies sement gebruik vir elke 4 kruiwaens sand

Steenbewapenening (brickforce)
Bouregulasies stipuleer dat daar steenwapening ten minste elke 4de laag ingesit moet word, afhangend van die tipe struktuur ens.

Neem die hoogte van jou muur in meter en deel dit deur 0.085 (Elke steenlaag is 85mm hoog)

Neem nou hierdie syfer en deel dit deur die aantal lae waarop steenwapening voorgeskryf word (bv 4) en maal dit met die lengte van jou muur om die totale lengte wapening benodig te bepaal.

Neem nou weer hierdie syfer en deel deur 20 om die aantal rolle wapening te bepaal. Onthou om te spesifiseer of die wapening vir ‘n enkel of dubbelmuur is.

Arbeid
Geen vaste reëls bestaan meer vir arbeid nie, en dit is gewoonlik maar ‘n onderhandelde besigheid. Vir beramings doeleindes kan gebruik gemaak word van dievolgende metode:

Basiese messelspan = 1 Steenleër en 2 Arbeiders en hulle kan ongeveer 700 pleisterstene of 500 sierstene per dag messel.

‘n Arbeider van die straat af word in Gauteng tussen R60 tot R100 per dag betaal en ‘n messelaar R150 tot R200 per dag

Deel die hoeveelheid stene wat gemessel moet word deur die 500 of 700 soos hierbo om die hoeveelheid dae te bepaal en maal dit met salaries van die messelspan om koste te bepaal.
Uitgewerkte Voorbeeld
Bou ‘n Dubbel Tuinmuur wat gepleiste gaan word 25 meter lank x 2 meter hoog nadat openinge vir hekke afgetrek is

Oppervlak van tuinmuur = 50 vierkante meter

Stene vir dubbelmuur = 50 x 110 = 5500
Sand = 5500stene/1000stene per kubieke meter sand = 5.5 kubieke meter (5.5 kubiek = 1 wipbakvrag)
Sement 5kubieke meter x 8 sakkies per kubiek = 40 sakkies
Steenwapening = 2meter hoog/0.085 = 24 lae (afgerond)/4 wapening elke 4de lag = 6 x 25meter lank = 150meter wapening/20meter per rol = 7.5 rolle. Rond af na 8 rolle
Arbeid 5500/700stene per dag = 8 dae (afgerond) x (180+80+80) = R2720 beraam

Lekker bou en kom wys die foto’s Maandag

Jaco.

P.S. Ek tag nou sommer almal in die algemeen om iets interresant van jou dagtaak te deel (as jy wil)